Paroles de la chanson Yannig Skolan par Chansons Bretonnes

I
Ar gwall-daol

I
Tro mare e sarre en dé
Teue en drufereh du-mé
Pe'z a en drufereh en ti
Doc'h en holl defe jolori

"Doue d'ho pennigay en ti-mé
C'hwi, gwregeh, ha c'hwi, bugale,
Deut on ur wech c'hoazh de vale
Mat er bed ganeoc'h tro-zreme ?

- Allas ! me c'homer, ne c'hwitan
Nemet en oac'h peur e zo klañv

Ha mar bad re bell e gleñved
Dav vo din mont de glask me boued

Tapet ur skabell, korn en ti,
Me c'homer, euit azeiñ
Aze'et aze, me c'homer,
Ha kontet din-me un dra gaer

- Traeu gaer a-walc'h e zo digouet
Ma soñj, me c'homer, peus kleuet
Ne peus ket kleuet, me c'homer,
Pezh zo digouet en-dro d'er gêr ?"

Neuze e laras en oac'h kaezh :
"Reit d'er c'hwek-se ur bannac'h laezh
Ur bannac'h laezh hag ur grampoue'enn
E vo lakaet àr he barlenn

- Yannig Skolan zo bet tapet
Zo bet tapet, zo bet krouget
Krouget berr àr dachenn Guened
Torfedeù 'walc'h en defa groet

- Me c'homer, ne glevan netra
N'hallan ket mont 'maez en ti-mañ
N'hallan mont neblec'h de vale
Ged pridiriñ me bugale

- Torfedeù 'walc'h en defa groet
Diboe e oe deut àr er bed
Torfedeù 'walc'h en defa groet
Kentoc'h de lahein Morised"

II

Pe ziwalle loned hi zad

Ned oa de'i soñj nemeid de vad
Ned oa goelet meid ur wech 'nei
Gwelet hi daon mont ged er blei

Nemeit ur wec'h ned oa goelet
Setu div bremen he deus groet
Goelet he doa ha groet ur son
E ve kanet dre er c'hanton :

"Kaon ! kaon ! d'am daonig gwenn-gornik !
Kaon ! kaon ! d'am daonig gwenn-gornik !
Kaon ! siwazh ! kaon, kaon ! d'am dañvad
Hag e oa ul lonig ker mat !

Yannig Skolan oe tont d'er gêr
Gantañ en dorn he grog poueher
"Morisetig, c'hwi a gan ge
Ur bouchig e refet dein-me ?

- Ur bouch deoc'h-hu me ne rin ket !
Ur paotr fall oc'h mar zo er bed"
Hag hi kuit doc'htu e redek
Allas ! ne oe tost kêr er-bed

Ha eñv àr he lerc'h a lammas
Ha skoiñ ganti teir gwech a reas
Ken hi file 'n he foullad gwad
Sarret ganti he daoulagad

III

Seizh pe eizh dé oa tremenet
He zad d'er gêr ne oe ket bet
Ar-dro unnek eur pe greisteiz
He zad d'er gêr a zigoue'e

"Bugale baour, dein-me laret
Petra peus 'ta ken glac'haret
Nag ho c'hoar men emañ-hi oet ?
- Abred a-walac'h e klevet !

Abred a-walac'h e klevet !
Doare doc'h hon c'hoar Morised
Emañ-hi du-hont tal er prad
Hag hi e neuial en he gwad

Er gwriader 'neus hi lazhet !
Diboe m'hoc'h ac'han diblaset
Oa kas hi dougen d'er pec'hed
Yannig Skolan neus hi lazhet !

Oe kas hi dougen d'er pec'hed
Ha padal n'en deus ket gallet
Hi a oe ur plac'h diged Doue

Felle ket de'i koll he ene

IV

E kas Morisetig d'en douar
Divere he gwad doc'h er c'harr
Tud kozh ha yaouank e ouelein
He zad, arlerc'h, e hirvoudiñ

Mar 'peus c'hoant de wel't Morised
Ar hent bras Melrand hi c'havet
Sauet zo bet ur groez neue
Lec'h he deus kollet he buhez


II

Truez an ene

Yannig Skolan hag e baeron
Zo aet ho-daou da c'houl pardon
Da c'houl truez d'an eneoù
Da c'houl pardon d'ar bec'hejoù

Yannig Skolan a c'houlenne
En tin e vamm pa antree :
"Noz vat ha joa, tud an ti-mañ
Hag ed eur da gousket ennañ ?

Aet oc'h holl amañ da gousket
Nemet ma-unan on chomet
Me a zo chomet ma-unan
Amañ, evit pakañ an tan

- Na dre belec'h oc'h-hu deuet ?

Ma dorojoù em boa prennet
Prennet em boa ma dorojoù
Ha morailhet ma frenechoù

- Mar poa prennet ho torojoù
Me oar an doare a-bell zo
Enaouet gouloù, c'hwezet tan,
Ha welfec'h daou e-lec'h unan"

Ar gouloù pa 'n oa enaouet
Meurbet emañ-hi bet spontet
O welet daou war al leur-zi
Da hanternoz o komz outi

"Tevet, ma mamm, na spontet ket
Me eo ar vab hoc'h eus ganet
Zo deut ur wech c'hoazh d'ho kwelet
Bennozh va mamm am eus kollet

- Mard eo va mab ez eo hemañ
M'em boa e lianet e gwenn
Hag eñ deut e du d'am gwelet
Evit doare ez eo poaniet ?

Du eo da varc'h, du out ivez
Ker garv e reunenn ma pikfe
C'hwezh karno rostet a glevan
Va mallozh gant va mab Skolan

- War marc'h an Diaoul on deut amañ
Gantañ d'an ifern ez ean
Me ya d'an ifern da leskiñ
Ma na garet ma fardoniñ

- Penaos oufen az pardoniñ ?
Bras eo an droug a teus graet din
Lakaet 'teus an tan em zri forn
Ha devet triwec'h loen-korn

- Va mamm, me oar ervat am eus
Siwazh ! dre wall-youl, ha dre reuz
Hogen, pa 'm eus truez Doue
Va mamm, ho pet ouzhin truez !

- Penaos oufen az pardoniñ ?
Bras eo an droug a teus graet din
Lakaet an tan e seizh bern ed
Seizh iliz, seizh beleg devet !

- Va mamm, me oar ervat am eus
Siwazh ! dre wall-youl ha dre reuz
Hogen, pa 'm eus truez Doue
Va mamm, ho pet ouzhin truez !

- Penaos oufen az pardoniñ ?
Bras eo an droug a teus graet din
Gwallañ teir eus da c'hoarezed
Lazhañ va nizez Morised !

- Va mamm, me oar ervat am eus
Siwazh ! dre wall-youl ha dre reuz
Hogen, pa 'm eus truez Doue
Va mamm, ho pet ouzhin truez !

- Penaos oufen az pardoniñ ?
Bras eo an droug a teus graet din
Kollet 'teus din va levr bihan
Va flijadur war ar bed-mañ

- Va mammig baour, em pardonnet
Ho levr bihan n'eo ket kollet
'Mañ 'barzh ar mor tregont gourhed
Ur pesk alaouret d'e viret

N'eus erruet droug ebet gantañ
'Met gant teir follenn ane'añ
Unan dre zour, un all dre wad,
Un all dre zaeroù 'm daoulagad"

Neuze e baeron, oa gantañ,
E deuas da gomz evitañ
"Te zo ur vamm kriz a galon
Da lezel da vab hep pardon !

Penaos, mamm griz ha dinatur
Bardonfez ket da grouadur !
Ma ya da vugel d'an ifern
Te yey ivez kig hag eskern

- C'hoazh kent evit m'az pardoniñ
Un dra bennak e larfez din
Dimeus ar pezh a teus gwelet
Abaoe m'out aet diwar ar bed

- Va mamm, va mamm, ma em c'hredet,
Kouez d'ar gwener na refec'h ket
Neb a verv lijoù d'ar gwener
Parediñ ra gwad hor Salver

Lamfet ket 'r c'houg digant ar yar
Na Yann-ar-boc'hig digant par
Ar c'hilhog a gan en uhel
A gan pa gan an ebestel

Pa gan ar c'houg da hanternoz
Kan an aelez er baradoz
Pa gan ar c'houg, pa strink an deiz
E kanont holl, sent hag aelez

Dreist pep tra deoc'h e kelennan
Ha dalc'het konv eus an dra-mañ :
Minellet an hoc'h, pe hend-all
Turiellañ ray ar park segal

Mouchet mat ho kole bihan
Pe hend-all ho po poan gantañ
Ha heudet mat ho marc'h divank
Pe en em veuziñ ray er stank"

Antronoz beure, pa savas,
Mein an oaled toull a gavas :
Hi a gavas toull an oaled
Gant penn e c'hlin oa bet toullet

Ha lommoù gwad e-touez ar glaou
En doa skuilhet gant e zaeroù
War al ludu ha war an tan
Hag a oa bet mouget gantañ

"C'hwezh tin ha lore a glevan
Va bennozh gant va mab Skolan
Gwenn eo e varc'h, gwenn eo ivez
Ker splann hag an heol eo e voue

Va mab Skolan, lavar din-me
Ma ez 'ta gant da baeron-te ?
- D'ar baradoz ez an gantañ
Gant bennozh va mamm a gavan"